Uzurmisht

Fshati Uzurmisht gjendet 8 kilometra larg Tetovës, në komunën e Zhelinës, një fshat shumë i vogël, por mjaft i organizuar në të gjitha aspektet. Ndonëse banorët e këtij fshati janë kryesisht të ardhur nga fshatrat e malësisë së Dervenit, po të shkosh atje të krijohet përshtypja se të gjithë banorët janë të një familjeje. Fshati Uzurmisht në historiografi haset prej shekullit XV, gjegjësisht në vitin 1453 ku ka pasur 15 shtëpi, ndërsa në vitin 1468 ka pasur 20 familje . Ky lokalitet përmendet në dëshmitë e Isa Beut mbi Pollogun e Tetovës, përderisa në disa shënime haset me emrin Zarnisht.
"Fshati i vogël, por ka bërë punë shumë të mëdha", shprehen banorët e Uzurmishtit, të cilët në mbrëmje të gjithë mund t'i takosh në kafene në qendër të fshatit. Kafeneja për më të moshuarit është i vetmi vend ku ata e kalojnë kohën e lirë, duke folur për politikë, qajnë hallet e përditshmërisë, për papunësinë e cila është brengë për të gjithë banorët. Në Uzurmisht askush nuk merr ndonjë nismë pa lejen e bashkësisë lokale, e cila për banorët e Uzurmishtit është institucioni ku të gjithë mund të drejtohen dhe të shprehin mendimet e tyre.
Për të mësuar më shumë në lidhje me këtë fshat të komunës së Zhelinës, ne fillimisht u ndalëm në zyrën e bashkësisë lokale, ku u takuam me Muhamet Zylbeharin, kryetar i saj, njeri i cili ka përvojën se si të udhëheqë një "institucion", pasi për një kohë të gjatë ka qenë kryesues i këshillit të komunës së Zhelinës. Muhamet Zylbehari tha se në fshatin Uzurmisht ka gjithsej 105 familje me 740 banorë, gjë që e bën të jetë fshati më i vogël në komunën e Zhelinës, por mbetet fshati më i organizuar. Jemi të vetmit që kemi bërë plane për rregullimin e infrastrukturës dhe të shërbimeve të tjera për një afat më të gjatë. Sa i përket infrastrukturës, të gjitha rrugët dhe rrugicat e fshatit janë të asfaltuara, por problem vazhdon të mbetet uji për pije. Ai tha se banorët e fshatit momentalisht ujë për pije shfrytëzojnë nga puset. Kemi shpresë së në bashkëpunim me Qendrën Maqedonase për Bashkëpunim Ndërkombëtar (QMBN) dhe ambasadën e Norvegjisë të bëjmë rregullimin e ujësjellësit në fshat, pasi ky projekt nuk është realizuar me kohë për shkak të disa mosmarrëveshjeve mes QMBNsë dhe ambasadës norvegjeze. Për fshatin Uzurmisht ky është një projekt vital, pasi njëherë e përgjithmonë do të zgjidhë çështjen e ujit për pije. Bashkësia lokale e Uzurmishtit ka dorëzuar një projekt në ambasadën e Norvegjisë për ndërtimin e shkollës fillore, e cila pritet të jetë gati në vitin 2007", tha Muhamet Zylbehari. Sipas tij, shkolla ku aktualisht mësojnë 50 nxënës është mjaft e vjetruar. Ajo është një barakë, e cila në çdo kohë mund të shembet, kurse nxënësit nga klasa e pestë deri në të tetën mësojnë në Shemshovë. Shpresojmë se në vitin 2007 nxënësit e Uzurmishtit do të mësojnë në shkollën e re.
Një tjetër projekt që është finalizuar këtë vit është xhamia e fshatit, e cila është ndërtuar me vetë kontributin e banorëve. Ai tha se mbi 150 mijë euro janë investuar për ndërtimin e këtij tempulli fetar. Zyrtarisht ky objekt është lëshuar në përdorim vetëm një muaj më parë.
Preokupim parësor i banorëve të fshatit Uzurmisht mbetet papunësia. Pjesa dërmuese e banorëve janë në kurbet në vendet e ndryshme evropiane, kurse ata që janë këtu mundohen që përmes punës në sektorin privat të sigurojnë bukën e gojës. Kryetari i bashkësisë lokale të Uzurmishtit, Muhamet Zylbehari, thotë se për të gjitha punët që janë realizuar në këtë fshat meritën e kanë të rinjtë, të cilët në asnjë moment nuk kanë refuzuar nismat e bashkësisë lokale. Rinia e këtij fshati çdo herë është munduar që të punojë për të mirën e fshatit. Kanë bërë përpjekje për të rregulluar fushën e futbollit, e cila kërkon edhe pak punë që të jetë gati, por shpresojmë se me ndihmën e donatorëve të jashtëm edhe ky projekt do të realizohet. Për këtë iniciativë kemi marrë premtim për ndihmë edhe nga ambasada e Norvegjisë. Nuk është rastësi që Uzurmishti është fshati më i organizuar për shkak se nga viti 1997 e deri në vitin 2006 janë investuar afër 700 mijë euro. Të gjitha mjetet janë mbledhur nga vetë banorët, me përjashtim të një shume të vogël që janë investuar nga komuna e Zhelinës dhe disa organizata të tjera. Një projekt tjetër që kërkon investim kapital prej 1 milion eurosh, është rregullimi i kanalizimit që duhet të realizohet në bashkëpunim me fshatrat Pallaticë dhe Shemshovë, por për këtë projekt duhen donatorë të fuqishëm. Me këtë mënyrë të organizimit perfekt të banorëve deri në vitin 2010 fshatin Uzurmisht do ta bëjmë fshatin më modern në Maqedoni. Ndriçimi publik në këtë fshat mirëmbahet nga komuna e Zhelinës, gjë që dëshmon për bashkëpunimin që ekziston mes komunës dhe bashkësisë lokale.
Këtu mësuam se mbi 90 për qind e nxënësve të këtij fshati e vazhdojnë shkollimin e mesëm dhe atë superior. Rinia që vepron jashtë dallohet për aktivitetet që i organizojnë atje, sidomos në fushën e sportit, u shpreh Naser Fejzuli, i cili punonte në një shitore. "Infrastrukturën në fshat e kemi të rregulluar, rrugët janë të gjëra, por nuk kemi vende pune. është fshat i vogël dhe mundësitë për të investuar ne këtu janë fare të vogla", u shprehën një grup njerëzish që qëndronin në qendër të fshatit. Këtu e kalojmë mbrëmjen të gjithë me shpresë se një ditë jo vetëm për banorët e Uzurmishtit, por për të gjithë do të bëhet më mirë.
Gëzon fakti se gjallëria e jetës në këtë fshat të Pollogut të Poshtëm të lë përshtypje se këtu jeta ka marrë trajtën e rregullt, gjë që vërtetohet edhe me ndërtimin e shtëpive të reja me standarde më moderne.